உயர் ரத்த அழுத்தத்தோடு தொடர்புடைய, 107 மரபணுக்கள்

உயர் ரத்த அழுத்தத்தோடு தொடர்புடைய, 107 மரபணுக்களை விஞ்ஞானிகள் கண்டறிந்துள்ளனர்.பிரிட்டனில் செயல்படும், ‘பயோபேங்’ (UK Biobank) என்ற திட்டத்தில் பங்கேற்ற, 40-69 வயதில் உள்ள 422,000 பேரிடம் மேற்கொண்ட மரபணு முடிவில் இந்த கண்டுபிடிப்பு சாத்தியமாகியுள்ளது.

இந்த மரபணுக்கள், மனித ரத்த நாளங்கள் மற்றும் இதயத் திசுக்களில் செயல்படுபவை. லண்டனிலுள்ள இம்பீரியல் கல்லுாரி (Imperial College)மற்றும் குவீன் மேரி பல்கலைக்கழகம் (Queen Mary University) ஆகியவற்றை சேர்ந்த விஞ்ஞானிகள் அடையாளம் கண்டுள்ள இந்த மரபணுக்களின் அடிப்படையில், புதிய மற்றும் செம்மையான உயர் ரத்த அழுத்த மருந்துகளை உருவாக்க முடியும்.மேலும், இளம் வயதிலேயே ஒருவருக்கு உயர் ரத்த அழுத்தம், இதய நோய் மற்றும் பக்கவாதம் வரும் வாய்ப்புகள் உள்ளதா என்பதை துல்லியமாக கணிக்கவும் இந்த கண்டுபிடிப்புகள் உதவும் என்று விஞ்ஞானிகள் தெரிவித்துள்ளனர்.

உயர் ரத்த அழுத்தத்தை தடுக்க, வாழ்க்கை முறை மாற்றங்கள் மற்றும் உணவு முறை மாற்றங்களை பரிந்துரைக்கவும் இக்கண்டுபிடிப்புகளை மருத்துவர்கள் பயன்படுத்திக்கொள்ள முடியும்.

Source The Sun andMedical News Today

இதயத்துக்கு ஒரு ஒட்டு

மாரடைப்பு வந்தவர்களுக்கு, இதயத்தின் ஒரு குறிப்பிட்ட பகுதி காயமடைந்து தழும்பு ஏற்பட்டு இருக்கும். இதயம் துடிப்பது, இதயமே உற்பத்தி செய்யும் சிறிய அளவினாலான மின்சாரத்தால் (electrical impulses) தான். இந்த தழும்பு, மின்சாரம்  உற்பத்தியாவதற்கும்  கடத்துவதற்கும்  தடையாக இருக்கும்.  இதயத்தின் மற்ற பகுதி செயல்பட்டு, ஒரு பகுதி செயல்படாமல் இருப்பது, இதயத் துடிப்பின் லயத்தை பாதிப்பதோடு, காலப்போக்கில், ‘அரித்மியா’ (cardiac arrhythmia) போன்ற குறைபாடுகள் வரலாம்.

இதயத்தின் செயல்படாத பகுதியை செயல்பட வைக்க, இங்கிலாந்தின் இம்ப்பீரியல் கல்லூரியின் மோலி ஸ்டீவன்ஸ் (Dr. Molly Stevens) மற்றும் ஆஸ்திரேலியாவின் நியூ சவுத் வேல்ஸ் பல்கலைக்கழகத்தின் டாமியா மாவாட்(Dr. Damia Mawad)  தலைமையிலான ஆராய்ச்சியாளர்கள் ஒரு ஒட்டை (patch) உருவாக்கி இருக்கின்றனர்.

 

 

damia_400_300
Dr. Damia Mawad
images
Dr Molly Stevens

கடல் வாழ் இறால் வகை ஒன்றின் ஓட்டிலிருந்து எடுக்கப் பட்ட, ‘சிடோசான் (chitosan)’, ‘பாலிஅனிலின் (polyaniline)’ என்ற மின்சாரத்தை கடத்தும் திறனுள்ள பாலிமர் மற்றும் தாவரங்களிலிருந்து எடுக்கப்பட்ட, ‘பைடிக்’ அமிலம் (phytic acid) ஆகிய பொருட்களை கலந்து, இந்த இதயத்திற்கான ஒட்டை ஆராய்ச்சியாளர்கள் உருவாக்கி இருக்கின்றனர்.

இந்த ஒட்டை இதயத்தின் பாதிக்கப்பட்ட இடத்தில் ஒட்டும்போது, மற்ற பகுதியிலிருந்து அப்பகுதிக்கும் மின்சாரம் கிடைத்து துடிப்பு உருவாகிறது. இந்த ஒட்டு இதயத்தின் தசைகளோடு கலந்துவிடாது என்றும், இதை தையல் போட்டு ஒட்ட வேண்டியதில்லை என்றும் ஆராய்ச்சியாளர்கள் தெரிவித்துள்ளனர்.

இதயத்தின் மீது ஒட்டை வைத்து, பச்சை நிற லேசர் கதிர்கள் மூலம் லேசாக பொசுக்கினால் அது ஒட்டிக்கொள்ளும். எலிகள் மீது இந்த ஒட்டு வெற்றி கரமாக வேலை செய்வதாகவும், விரைவில் மனித இதயத்தின் மீது சோதனைகள் துவங்கவிருப்பதாகவும் ஆராய்ச்சி யாளர்கள் தெரிவித்துள்ளனர்.

Source Daily Mail